Det var fleire gira og spente elevar som sat i bilane. Før me fekk kome i gang med sjølve spelet, fekk både elevar og vaksne ei grundig innføring i reglar og tryggleik, samt ei omvising for å bli kjende med banen. Me lærte mellom anna at det ikkje er eit våpen, men ein markør, og litt om korleis dei fungerer, noko fleire syntest var interessant.

Deretter vart me delte opp i lag: svart, raudt og blått. Det blå laget var spesielt nøgd med å få med seg Amalie (OSR). Dei andre laga var truleg endå meir nøgde med denne ordninga, sidan dei fekk moglegheit til å pepre ho med kuler utan å få merknad. Så var det endeleg klart for start! Me hadde fleire rundar der me rullerte mellom laga, med to lag som spelte mot kvarandre i kvar runde, medan resten sat i hovudkvarteret og følgde nøye med på skjermane for å sjå kva som gjekk føre seg på banen. Etter mykje adrenalin, spenning, kuler og treff stod det raude laget igjen som vinnar. Me gratulerer dei med sigeren!

Tusen takk til Reke Event for bidraget og ikkje minst for det fantastiske opplegget og den flotte dagen de gav oss! Me storkoste oss – fleire av elevane og dei vaksne kunne gjerne gjort dette igjen, nok aller helst kvar einaste dag. Det var fornøgde elevar og vaksne som vende snuten tilbake til ungdomsskulen. Takk til elevane i 8A for godt humør og kameratskap, og ikkje minst til føresette som bidrog med køyring – det set me stor pris på!

Ønskjer alle ei herleg helg !