Økonomiprosjekt 10.trinn
I veke 12 har 10. trinn arbeidd med eit stort og spanande økonomiprosjekt. Målet med prosjektet var å gi elevane innsikt i korleis økonomi fungerer i praksis – og kva det eigentleg kostar å vere vaksen.
Publisert: 23.03.2026 09:26 Sist endra: aldri Forfattar: Hege Jonathanson
Elevane vart delte inn i grupper, der nokre levde som «ektepar» medan andre var åleine. Kvar gruppe trekte ein lapp som avgjorde kor mange barn og kva husdyr dei hadde, og dei trilla terning for å finne alder. Med dette som utgangspunkt skulle dei lage ein realistisk økonomiplan for «familien» sin.
Gjennom veka har elevane utforska spørsmål som:
Kva faste utgifter har ein familie?
Kva kostar mat, bustad, straum og forsikringar?
Kva må ein betale i skatt, og korleis fungerer feriepengar?
Kva er viktig å vite om lån og renter?
Dette viste seg å vere både ei utfordring og ein augeopnar, særleg når elevane oppdaga kor mange kostnader som faktisk følger med vaksenlivet.
Prosjektet har gitt elevane verdifull kunnskap om økonomi, prioriteringar og ansvar – og truleg også litt meir forståing for kvardagen heime!
Ei lærerik og nyttig veke for alle på 10. trinn.