Skidag 2026
Onsdag 4. mars gjennomførte me årets skidag ved Samnanger ungdomsskule. Elevane fekk velje mellom ski og snowboard i Eikedalen, eller langrennstur og anna vinteraktivitet i Mødalen. Det vart ein god og aktiv dag for dei aller fleste.
Publisert: 09.03.2026 10:37 Sist endra: aldri Forfattar: Hege Jonathanson
I Eikedalen var det mange som stod på ski for aller første gong. Lærarar var ute i bakken og gav instruksjonar, støtte og gode tips slik at alle kom i gang. Nokre elevar utfordra seg sjølve i parken, og prøvde både hopp og rails. Stemninga var svært god gjennom heile dagen.
I Mødalen gjekk dei som ville ein flott tur på langrennski. Der var det òg primus med grilling av pølser og marshmallows, leik i snøen og mykje godt humør. Vêret vart overraskande bra – med god temperatur og fine forhold.
Alt i alt vart dette ein vellukka skuledag ute i vinterlandskapet, med mange gode opplevingar for store og små.